भारतीय लंच होम - गिरगाव, चिरा बझार

चर्नी रोड स्टेशन जवळ असलेल्या ठाकुरद्वार नाक्यावरून जगन्नाथ शंकरशेठ रोड वर चालायला सुरुवात केलीत की गंगाराम खत्री वाडीच्या तोंडावरच हे छोटेखानी हॉटेल आहे. फक्त मांसाहारी पदार्थ मिळणाऱ्या ह्या हॉटेल मध्ये अवघे ५-६ पदार्थ मिळतात. पण जे मिळते ते सर्व अमेझिंग आहे.. 

काळ्या मिरीच्या मसाल्यात बनवलेल्या ह्या सर्व डिश काही वेगळ्याच असतात.. इथे स्टार्टर, मेन कोर्स, डेसर्त असली भानगड नाही. डायरेक्ट जेवणावरच ताव मारायचा. चिकन मसाला, कलेजी मसाला, भेजा मसाला, मटन, अंड्याचं ओम्लेट असे मोजकेच पदार्थ.. पण ते बनवण्याची पद्धत लई भारी.. चारही बाजूनी वाहणाऱ्या तेलाकडे मात्र बघत बसू नका. पंजाबी, कोकणी, कोल्हापुरी ह्या कुठल्याच स्टाईल मध्ये न बसणारे हे पदार्थ तुम्हाला नक्कीच आवडतील. काळ्या मिरीचा भरपूर वापर करून बनवलेल्या ग्रेवीचा आस्वाद घेताना सुटणारा घाम टिपायला रुमाल मात्र जवळ ठेवा. तेंव्हा एखाद्या रविवारी दुपारी भेट द्या ह्या जागेला आणि मस्त ताव मारा.

सत्कार - गोरेगाव

गोरेगाव रेल्वे स्थानकाबाहेर पूर्वेला जे मोठे बस स्थानक आहे त्याच्या समोरच सत्कार हॉटेल आहे. स्वतः शोधण्याच्या भानगडीत पडू नका. सरळ कोणालातरी विचारा.

कारण तुम्हाला स्वतःला ते सापडणं मुश्कील आहे. एका चिंचोळ्या गल्लीत शिरून त्याहून चिंचोळ्या जिन्यावरून पहिल्या मजल्यावर गेलात कि तुम्ही सत्कार मध्ये शिरता..

पोहोचताना नक्की कस हॉटेल आहे अशी शंका मनात येईल पण एकदा इथे जेवलात कि तुम्हाला पटेल 'Narrow is the way which leads to Heaven'.

सत्कार मध्ये शिरताच मासळीच्या सुवासाने तुमच स्वागत होईल. अस्सल मालवणी पध्दतीचे मासे इथे तुम्हाला इथे चाखायला मिळतील.. पापलेट, कोलंबी, सुरमई तर आहेतच पण त्याबरोबर बोंबील, मांदेली, बांगडा, तिसर्या हेही चाखता येईल. गरम गरम वड्यांबरोबर कालवनावर ताव मारा.. इथे चीकनही झक्कास मिळत बर का.. मस्त दोन तीन प्रकारचे फ्राय, मग कालवण वडे आणि सर्व झाल्यावर थंडगार सोलकढी पिऊन इतिश्री करा.

पण इथे फक्त मालवणी पद्धतीचेच पदार्थ मिळतात. तुम्ही मालवणी असाल तर इथे जाऊन घरच्या खाण्याची तुलना करत बसू नका. पण मालवणी नसाल तर मात्र हि तुमच्यासाठी झक्कास मेजवानी ठरेल हे नक्की.  

Check all natural and chemical free traditionally made products here http://indicwisdom.com 

गुडलक कॅफे - एफ सी रोड, पुणे

चितळ्यांचे दुकान, सदाशिव पेठ, प्रभात रोड ह्या ठिकाणांच्या सानिध्यात मांसाहारासाठी फेमस हॉटेल असू शकत असा मुळात मला प्रथम विश्वासच बसला नव्हता.. पण असा हॉटेल फक्त आहेच नाही तर जबरदस्त चालतंय.. गेल्या अनेक दशकांपासून हे हॉटेल इथे आहे.. पिढ्या बदलल्या पुणे बदललं, पण इथली गर्दी मात्र तशीच आहे.. बाहेरून डोकावलं तर अगदी टिपिकल इराणी हॉटेल आहे.. पण इथले पदार्थ म्हणजे अहाहा.. गोल्डन भेजा फ्राय, बिर्याणी, मटण कटलेत, चीकेन चिल्ली, खिमा असे एकापेक्षा एक सरस पदार्थ तुमची पावलं पुन्हा पुन्हा इथे वळवतील..

ह्या हॉटेल मधले स्प्रीन्कलर्स हा अजून एक कुतूहलाचा विषय आहे. जेव्हा कधी जाल त्या वेळी पुण्यातली तरुणाई इथे ताव मारताना तुम्हाला दिसेल. तेंव्हा पुढच्या वेळी जेंव्हा पुण्यात असाल तेंव्हा कॅफे गुडलक ला भेट द्यायला विसरू नका.  

सरदार प्रीतम सिंग का विशाल मशहूर धाबा .. अंबाला केंट

हि जागा आणि जागेचा नाव दोन्ही गोष्टी भन्नाट आहेत.. अंबाला केंट रेल्वे स्थानकापासून अगदी जवळच बस स्थानकाला लागून हा धाबा आहे.  सरदार प्रीतम सिंग ह्यांनी ४० वर्षापूर्वी सुरु केलेला धाबा इतका फेमस झाला कि सर्व जण त्यांचे नाव वापरू लागले. त्यामुळे ह्या जागी तुम्हाला प्रीतम सिंग नावाचे बरेच धाबे आढळतील त्यामुळे वरचे नाव नीट लक्षात ठेवा.

फार स्वछताप्रेमी असाल तर मात्र कदाचित तुम्ही येथे खाणार नाही.. पण इथला आलू प्याज पराठा आणि दही खाल्ल्यावर तो कळकट्ट धाबा सुद्धा तुम्हाला स्वर्गासामान वाटू लागेल.

इथले चिक्कण देखील अप्रतिम आहे.. धाब्याचा मेनू फार मोठा नाही काही ठराविक पण अतीव रुचकर पदार्थ तुम्हाला इथे चाखायला मिळतील.. तेंव्हा कधी अंबाला केंट भागात गेलात तर सकाळची न्याहारी इथे करायला विसरू नका. हा धाबा फक्त दुपारी ३ पर्यंतच उघडा असतो त्यामुळे संध्याकाळी येथे जाऊन फायदा नाही.

रावत मिष्टान भांडार - जोधपुर

भारतीय लोक राजस्थान ची ट्रीप एकदा तरी करतातच, आणि ह्या ट्रिपचा जोधपुर हा एक महत्वाचा बिंदू आहे. त्यामुळे जेंव्हा कधी तुम्ही राजस्थानची ट्रीप प्लान कराल आणि त्यातही जोधपूरला पोहोचाल तेंव्हा रावत मिष्टान भांडार ला भेट द्यायला विसरू नका. आणि तुमचा दिवस सुरु होतानाच नाश्ता करायला इथे जरूर जा.

इथली प्याज कचोरी, मावा कचोरी, गजक, घेवर हे सर्व तुडुंब भरून घ्या आणि मगच जोधपूरचा सुंदर किल्ला बघायला पुढे जा. प्याज कचोरी हि आपण जी दही कचोरी किंवा राज कचोरी खातो तशीच दिसायला असते.. (मुंबईत गोरेगावला सुरभी मध्ये तुम्ही हि खाऊ शकता). ह्यात चटणी आणि शेव घालून ह्या गरमा गरम काचोरीवर ताव मारा. बाकी सर्व पदार्थ गोड आहेत. 

गजक हे तिलापासून बनवतात आणि ते बरेच दिवस टिकू शकते, त्यामुळे तुम्हाला आवडलं तर pack करून बरोबर आणू शकता. घेवर हा जाळीदार डिश सारखा दिसतो आणि खायला फार खमंग लागतो. आणि मावा कचोरी हि प्याज काचोरीचीच गोड बहिण आहे. पण तीदेखील इथली स्पेकिअलित्य म्हणून नक्की खा.

खूपच गोड खाल्लं असं वाटलं तर इथे मिरची वडा सुद्धा चांगला मिळतो, तो खाऊन चव balance करू शकता. जोधपुरच्या लोकांची नाश्त्याची हि आवडती जागा असावी, कारण नेहेमीच गर्दीने फुललेली असते आणि मुख्य रस्त्यावरच असल्याने इथपर्यंत पोहोचायला फार कष्ट घ्यावे लागत नाहीत. मग आता जोधपूरला गेलात कि station road वर असलेल्या ह्या ठिकाणी हादडायला जा आणि कसा वाटल ते मलाही कळवा.

मामलेदार कचेरी मिसळ - ठाणे

ठाणे स्टेशन च्या जवळच मामलेदार कचेरी आहे. ह्या कचेरीला अगदी खेटून असल्याने ह्या मिसळीच नाव मामलेदार कचेरीची मिसळ. तसा ह्या हॉटेल मध्ये बरेच पदार्थ मिळत असावेत, पण अनेकदा जाऊनही मी मिसलीशिवाय कुठे पाहिलंच नाहीये. तुम्ही पण तेच करा नाहीतर तुम्ही नवखे आहात हे सर्वांना कळेल. हि बेस्ट मिसळ आहे का वगैरे वादात मी पडणार नाही. पण इथली मिसळ प्रत्येक खावाय्याने खायलाच हवी..

मस्त तिखट मिसळ आणि त्यावर लाले लाल तरी, वर भरपूर कांदा अशी मिसळ जमवा आणि मित्रांबरोबर त्यावर ताव मारा.. हे हॉटेल तसं छोट आणि साधंच आहे. त्यामुळे तुम्ही फारच status cautious असाल, किंवा एकाच बाकड्यावर ४ विविध अनोळखी लोकांनी बसून खाणं तुम्हाला आवडत नसेल तर बाहेरच्या लाईन मधून parcel घ्या आणि घरी जाऊन मिसळीचा आस्वाद घ्या, पण मिसळ खा जरूर..

मिसळीचा मिजाज जरा गरमच असल्याने सवय नसेल तर कमी तिखट 'तरी' घ्या.. नाहीतर माझ्या नावाने शंख कराल..

मग आता जेंव्हा कधी ठाण्याला जाल तेंव्हा हि मिसळ नक्की ट्राय करा आणि मला कळवा कशी वाटली ते..  

BTW ज्यांना 'तरी' म्हणजे काय हे माहित नसेल त्यांच्या माहितीसाठी, मिसळीमध्ये उसळ, बाबत्याचा ठेचा, फरसाण आणि कांदा असे components असतात.. आणि ह्याचं मिश्रण तयार झाल्यावर त्याच्यावर एक झणझणीत रस्सा ओततात.. हा रस्सा मिसळीची मजा अजूनच वाढवतो, अश्या ह्या रस्ष्याला 'तरी' म्हणतात 

हाजीअली ज्यूस सेंटर

तुम्ही हाजीअलीला गेला असाल तर तुम्ही इथे गेला असणारच ह्याची मला पक्की खात्री आहे. पण गेला नसाल तर इथे नक्की ब हेत द्या. हाजीअलीचा जो मुख्य signal आहे तिथे हे प्रशस्त juice center आहे. रात्री drive ला जाऊन इथे गाडी लावा आणि juice, pizza, sandwich, पावभाजी ह्यांचा मनसोक्त आस्वाद घ्या. विशेषतः pizza नक्की खा.. पण domino, pizza hut वगैरे मध्ये खाल्लेलं विसरून इथे pizza खा.. कारण इथला pizza म्हणजे एकदम घरगुती..

आणि बाकी काहीही आणि कितीही खाल्लत तरी पोटात थोडी(?) जागा ठेवा इथल cream खायला. इथे लीची, सीताफळ, आंबा अश्या विविध फळांच cream मिळत, जे केवळ अप्रतिम आहे .. हाजीअलीच्या साक्षीने दुसऱ्या दिवसापासून व्यायाम करण्याचा संकल्प सोडा, आणि ह्या fresh cream वर ताव मारा..

हे juice center रात्री एक वाजे पर्यंत उघड असतं. त्यामुळे रात्री जेवण झाल्यावर cream खायची हुक्की  आली तरी बिनधास्त इथे जा आणि एन्जोय करा ...